Silaia mi kaptu na taka hrem turin YMA in ngen- an chhungkua veng chhung chhuahsan turin an ti

by Editor

Tualchhung News

ZORAM TODAY| 30th August, 2025: Bawngkawn Branch YMA chuan vawiin khan thuchhuah siamin, August ni 29, 2025 zana Bawngkawn veng chhunga Rochhingpuia (44) S/ Haitinsanga, Bawngkawn Shalom vengin Lalhriatrenga Siakeng (21) S/o Lalrawngbawla, Zotlang (Aizawl) Pistol-a a kah chungchangah hian Bangkawn Branch YMA chuan pawi a tiin a thinrimthlak kan ti hle a, hetiang thil hi tun hnuah theng tawh lo se kan ti takzet a ni, an ti.

"Rochhingpuia te chhungkua hian August ni 30, 2025 zanlai dar 12:00 ral hmain Bawngkawn veng chhung chhuahsan nghal turin a hriattir a, hun tiam chhunga Bawngkawn veng an chhuahsan lo a nih chuan an chungah eng pawh theng se an duhthlanna a ni ang," tiin an thuchhuah chuan a tarlang a, chhiatni fund leh membership fee pawh pek let nghal an ni, an ti bawk.

"He pawi khawihtu Rochhingpuia hian a phu tawk hremna a na thei ang ber hmu ngei se kan ti a, pawi khawitu chhungte hian Lalhriatrenga Siakeng inenkawlna senso zawng zawng pawh hi tum sak vek bawk se kan ti. Bawngkawn Branch YMA chuan Lalhriatrenga Siakeng vanduaina tawh hi a pawi kan ti takzet a, dam taka damdawi in a chhuah san vat kan duhsak a, a kanna pawisa fai pawh pek a ni," tiin an tarlang.

Zotlang Branch YMA leh Zotlang Local Council, Aizawl pawhin thuchhuah intawm siamin, "Kan veng tlangval, Lalhriatrenga (21) s/o Lalrawngbawla Siakeng chu August ni 29, zan dar 9 bawr vel khan Rochhingpuia (44) S/o Haitinsanga, Bawngkawn Shalom venga khawsa chuan pistol-in na takin a kap a, tunah hian dinhmun ngaihtuahawm takin, Greenwood Hospital (ICU)-ah a awm mek," an ti a.

Khawtlang hruaitute chuan, "He pawi khawihtu hi ruihhlo (Meth) zawrh avanga a awmna hmasa atanga hnawh chhuah pawh lo tawk tawh a ni a, hetianga ram leh khawtlang duh loh thila inhnamhnawih-ten khawpui laili-a pawi rapthlak tak an khawih ngam ta mai hi pawi kan ti takzet a ni," tiin an tarlang.

"He pawi khawihna thleng hi keini, Zotlang Branch YMA leh Local Council te chuan pawi kan tiin kan dem takzet a, pawi khawihtu hian a phu tawk hremna hmu ngei se kan duh a, hremna a hmuh ngei theih nan a tuartu, Pu Lalrawngbawla Siakeng te chhungkua hi kan thlawp tlat dawn a ni," an ti bawk.

Nizan dar 10 rik hma deuh khan Bawngkawn Traffic Point bul lawkah lirthei in tai sual palh thleng avangin Rochhingpuia s/o Haitinsanga hian Lalhriatrenga s/o Lalrawngbawla Siakeng chu pistol in a dul bawr ah a kap a, a kaptu hi Police ten an man nghal a, a mi kah hi Greenwood Hospital, Bawngkawn ah a awm mek. #zoramtoday